誰呃鬼我食埋食埋啲唔夠健康嘅乳酪？

自從三年前第一次去希臘，第一次食到真正嘅希臘乳酪之後，我先知道平時食埋食埋果啲喺超級市場買嘅膠盒仔包裝嘅乳酪有幾膠，再上網check吓啲成分同製造過程，救命呀根本上係同食化學物質無乜分別（個人意見啫）。

真正嘅希臘乳酪用新鮮羊奶（或牛奶）加乳酸菌再發酵，4公升的牛奶先製造到1公升的希臘乳酪，所以蛋白質含量是普通乳酪嘅兩倍、鈣質亦高三倍、雖然熱量比較高，但同時營養價值又高好多，我都係果句：“食幾多咪做返幾多運動去燃燒返啲脂肪囉”，最緊要食嘅嘢係有營養，食幾多唔係最大問題（再講：個人意見啫）。

喺香港好努力咁揾希臘乳酪，一見到寫住”Greek Style Yogurt”就以為執到寶，70幾蚊一盒都照買，食落個質地又黏又厚，又酸酸地又易飽肚，係佢喇！點知又中伏，原來”Greek Style Yogurt”同”Greek Yogurt”完全係兩回事，佢哋嘅共通點只係一樣係好貴！至於有乜分別，問Google啦。當然重點係Greek Yogurt係好啲嘅！

點解我個Facebook Page要叫做”My Big Fat Greek Yogurt”？因為我幾乎每日都食大大兜希臘乳酪做早餐呀！又Big又Fat嘅Greek Yogurt呀！簡直係我嚟希臘嘅主要誘因！今日呢款希臘蜜糖+肉桂粉希臘乳酪（果兩球唔係雪糕，係乳酪！），連阿Leon（貓仔）都想食呀！嚟緊會源源不絕咁upload希臘乳酪嘅寫真，我諗可能會有人好似我咁為咗食真正嘅希臘乳酪而去希臘啩。