前言

Er…當我岩岩買好鹿兒島嘅機票果陣，其實我都仲係好迷惘，因為我覺得…er…旅行始終唔係話去就去…第一，去之前要了解下先…（似唔似某洗頭水廣告台詞）

 

不過正如上段所言，鹿兒島依個名都算聽得多，但係講到印象…又真係冇乜：活火山（新聞）、種子島-有太空中心（秒速五cm）、近代軍佬好堅抽（歷史書）。

慢慢摸索落下，先察覺到，鹿兒島除左靜態左少少，其實都有好多野睇（不過真係得睇）。

行程表

第一日21/1

說來慚愧，初初訂酒店果陣一心想方便後面行程，冇考慮咁多，結果第一日係國分係冇行程架…

依日嘅任務基本上係幫聽日做定準備，所以姑且跳過…

落地出關就即刻見到…

個溫泉係機場設施…

霧島PASS, 由JR代售…

第二日22/1

點解明知國分冇野行都要住依度呢？

因為想慳返啲時間可以訓晏啲…

頭班去霧島嘅巴士未到七點半嚮國分站開出，上到霧島神宮大約八點一鬆啲，如果住鹿兒島市區…應該都唔洗諗搭到～

第一烏居

 

見落車時間尚早，四圍行下先。

霧島市係霧島神宮附近畫左兩條參考路線，分別係「霧島神宮・霧島七不思議」同「霧島神水峡」比遊客參考（我都唔知自己點搵到），我就行左一小段神水峽。

話就話主打神水峽，不過最大睇頭應該都係柱狀節理。柱狀節理係點形成就唔講咁多啦，反正就同火山活動有關（，其實想睇嘅唔洗飛咁遠，近近地香港嘅萬宜水庫都有，而且比世界聞名嘅英國巨人堤道更粗碌，雖然露得唔多）。

個峽有兩個水源，一面係泉水，一面係溪水，撞埋一齊個峽就會有煙。

傳說中嘅節理。

 

望完柱狀節理，順便睇埋神水峽之後，可以行返轉頭正式參拜霧島神宮。

神水峽…其實仲冇野睇…

依度去到邊都係龍馬有關。

 

霧島神宮，主祭神係《天孫降臨》嘅主角，天照大神之孫，地神第三代瓊瓊杵尊。

神話記載，佢奉祖母（？）之命，落人間接手表伯父（天照弟素盞嗚尊之子）大國主嘅葦原中國，順便送佢埋一邊養老。而佢降臨嘅地方，（應該）就係今日嘅高千穗峰。

一般描述嘅野就唔多廢話，出面大把文筆更好嘅可以參考。要補充少少嘅係，今日見到嘅霧島神宮已經係第三代，前兩代分別因唔同原因已經搵唔返同得返個遺址（係高千穂河原，有巴士上去但班次極疏）。

立碑為證。

時間尚早先冇乜人，九點打後第二班車＋旅行團黎到之後想影張咁清嘅影都冇乜可能。

參拜完，收集埋御朱印後（，行去望望霧島七不思議條路，見到舊參道條長命樓梯果斷轉身走），忽然記得自己仲未食早餐，提早下站行程先…食飯！

七不可思議就係行依條舊參道落去…

依舊石有傳同日本國歌有關。

神話之里，其實同神話好似冇乜關係，公園名啫，入面有纜椅有長滑梯玩，不過對我黎講最重要都係有野食…我愛你－－「道の駅」。

其實我唔明依個飯同西鄉有咩關係…

食飽飯，繼續下一站，丸尾，別名：溫泉鄉。

臨落巴士果陣，會有種一探究竟嘅衝動，點解橋下面會咁大煙嘅…？冇錯，落車果刻，你已經踏入左溫泉區嘅範圍。依度附近有兩樣野相對多：酒店多，瀑布多。

而跟住落黎都去嘅就係依度最有代表性（應該係）嘅瀑布－－丸尾滝。

丸尾滝，一場黎到都值得行黎影返張…

行返轉頭，上面就係溫泉市場。

Er…對於岩岩食完飯嘅我黎講…依度只係一個巴士轉車站…啪返粒溫泉蛋先。

真係有溫泉架…

不過面積就…一眼睇晒。

正常黎講，行到丸尾已經係行程終點可以搭返車落國分再轉JR返鹿兒島完左依日行程（所以係有時間去神話之里玩），但係其實山下面仲有個唔知算唔算景點嘅地方可以考慮下（要考慮因為霧島PASS唔包去到），就係鹿兒島神宮。

鹿兒島神宮，主祭神彥火火出見尊係地神第四代，瓊瓊杵尊同木花開耶姬（姐係富士山…）之子，第一代天皇神武天皇嘅祖父，《山幸海幸》入面嘅大佬山幸彥。去到依個位其實我已經唔明，點解神武都未東征（甚至未出世），富士山女神就已經同瓊瓊杵尊一齊左仲生埋仔…算啦道統創作嘅野我都係唔深究…

山幸海幸好似曾相識？冇錯…就係去指宿果部觀光列車嘅名。

維基話佢有祭吳太伯，但係我搵唔到囉…

參拜完，時間唔早唔晏，雖然附近仲有啲地方可以行（隼人塚），不過懶得行過去，所以早少少又搬竇…

両部鳥居，應該同嚴島神社同Model…

下一站鹿兒島！

（經過JR順手買定第日張交通PASS…）

搭JR果陣可以裝下出面，有段路會見到櫻島…

吉列豬扒同九洲拉麵之間我揀左佢，結論係有啲後悔。

其實我就好有興趣嘅，只係咁岩腸胃唔好…囉。

之後兩日嘅交通靠佢架啦…

第三日 23/1

鹿兒島交通，其實我都唔知依度算係方便定係唔方便，對旅客友善唔友善。大家都知，日本交通費出名玩命，所以大部分地方都有出唔同交通PASS比各路旅客選用（當中以近畿最為痴線），而鹿兒島嘅代表就係WELCOME CUTE，講真平就唔係平好多，勝在方便啲囉…不過要講嘅係，佢只係支援市營巴士，而當地主流嘅係民營嘅鹿兒島交通，所以即使有啲兜路，你都冇得揀…

市營，基本上大部分都係搭佢，少部分唔去櫻島嘅先搭民營果部。

點都好，巴士都係要上，目的地：仙巌園。

仙巌園，島津家別邸，「日本國内具有代表性諸侯庭園」（官網介紹），自薩摩藩二代藩主光久造園，到十一代藩主齊彬係度發展洋學。雖然戰後短暫交返比市管理，依加都仲係由島津家經營。

而由於廿一世紀至今最高收視嘅大河劇《篤姬》有係度拍攝，所以係園內好多劇照比人睇返。

參觀攻略我就唔詳講啦，對於仙巌園有三大重點，一部分係包括御殿在內嘅庭園本身，另一部分係洋學設施，姐係反應爐址之類，最後就係櫻島。點解櫻島要獨立拎出黎講呢？因為依度嘅角度真係靚…

我就對庭園冇乜研究同興趣嘅，本住一個「唔黎冇地方好去」嘅心態，結果得到120%嘅滿足。特別係御殿嘅書房，真係睇到我嘩嘩聲…

反應爐址…我真係識個鐵咩…

正門。

御殿。

我覺得最冇得彈嘅書房，正面望住櫻島，個景靚到絕！

可惜我去果日天色一劣…

貓神社，到底點諗到用貓眼黎判斷時間…

名物兩支棒，其實真係幾好食。

行完仙巌園之後可以支行埋隔離個集成館（比左錢架啦［誤），入面主要會講洋學工業發展同薩摩藩與海外嘅「（各種意義上嘅）交流」。原來「日の丸」成為日本國旗同薩摩藩都有關係，真係唔睇唔知。

（P.S.：入面唔比影相）

集成館。

而集成館後面停車場隔離有個薩摩切子工場，入面技師係度現代化整玻璃，得閒都可以睇下。

文化財入面開咖啡店…

離集成館五至十分鐘步程有另一個景點，異人館。

所謂異人館，其實姐係外國人（一般指歐美人）住所，最出名當然係神戶果堆。

而鹿兒島依個，其實講白啲就係鬼佬紡織工人宿舍［大誤］…

異人館入面除左有展出當年嘅居住環境之外，我覺得更有價值嘅其實係佢對洋學發展嘅時序展出。唔睇都唔知，依度咁強調嘅集成館，其實係行緊一條錯路…

翻新完其實同原本個樣都差好遠下…

簡單嘅一幅圖，背後個意思其實非常沉重…

 

終於，殺入依次行程另一個重點環節：櫻島。

櫻島火山，鹿兒島嘅象徵，離市區唔到十公里，由南北兩岳組成。其中北岳好似冇點爆過，而南岳就成日噴緊煙…

係參觀之前，食飯先！我重申一次，我愛你－－「道の駅」。

月讀神社。

好似話上面好多材料都係櫻島產…

爆爆爆爆爆炸頭！！！！！

 

食完之後，可以行左去旅客中心望下個火山基本資料先，等到夠鐘門口有得跟隊搭巴士。對一般遊客睇講最重要嘅兩個地方「烏島展望所」同「湯之平展望所」都會有五或十五分鐘嘅停留。

都唔知算好彩定唔好彩，反正我同事不斷話可惜見唔到…

順帶一提就係，由於唔肯定火山幾時會噴灰，所以如果唔想食灰嘅話最好冬天黎，因為西風會將啲灰吹向垂水果面；相反，夏天嘅風向有機會比到你火山之下特色體驗。

知名特產：火山灰雪糕！其實係黑糖加炭…

唔睇返都唔知，湯之平其實係寄生火山黎，姐係話你已經企係火山頂？！

完左依個周遊之後，可以返去旅客中心後面嘅桜島溶岩なぎさ公園浸住足湯睇日落，諗起都覺得幸福。

返到市區，終於黎到好似係最繁華嘅商業街天文館通。經過山形屋果陣忽然有種錯覺：就好似返左去八九十年前東北瀋陽咁，咁上下樣嘅建築，又咁上下樣嘅電車…

定係似老上海？

食完依餐晚飯，我嘅依個旅程都步入最後倒數…

老店嘅味道。

第四日 24/1

成日都話，旅行之前要做返多少功課。

唔好話要熟讀，但記得下三兩個名人／要事其實有利享受旅程。

就好似台灣老蔣，曼谷鄭王，新加坡萊佛士，京都本能寺，巴黎有貞德路易戴高樂，山陰大國主，咁鹿兒島記邊個呢？

答案係多到唔識數…

神話天孫山幸海幸三父子，藩主島津氏，倒幕系龍馬西鄉大久保，明治系西鄉東鄉大山…

反正總有一個方向岩入手。

得返半日（四個鐘）行程，

成班鄰居一齊作反…

係市區行個圈其實已經要走。

近近地去埋照國神社參一參拜先。

行行下又見到新婚旅行緊嘅龍馬夫婦…

照國神社，主祭神係第十一代藩主島津齊彬。本來只係県社，之後升格到別格官幣社，再賜正一位。

原來依個神社本來係東照宮黎…到底果陣嘅德川家有幾弱勢…

原來依個神社本來係東照宮黎…到底果陣嘅德川家有幾弱勢…

除左成為照國大權現，係神社隔離嘅探勝園仲先後豎立左佢同另外兩個島津家大佬：異母弟，齊彬之後實際揸FIT人久光，同久光之子兼齊彬養子，末代藩主（之後轉華族）忠義嘅銅像。

照國神社＆齊彬像。

久光像。

忠義像。

行過少少仲有鹿兒島出現次數最多，可以話消費死者至極嘅苦主，西鄉隆盛嘅銅像。

不過相傳無論係依座定係上野果座，都同真人唔似…

下一站搭巴士上城山。

可以見到，我去果幾日嘅天氣都幾唔友好…

其實城山除左有觀景台之外，亦都係一個滿載絕望嘅地方－－依度係末代武士西鄉隆盛戰死地。

佢雖然貴為維新三傑，但係身份嘅問題，變革反而抹去左自己階層嘅存在價值，迫於無奈走上絕路…

西郷隆盛洞窟，西南戰爭被包圍時嘅指揮部。

由於時間有限，雖然附近仲有三兩個博物館，但都係冇入去，萬分可惜…

快手去多間名店黎個Happy ending之後就要返香港了…orz。

鹿兒島城又搞復原。

八代藩主島津重豪，可能係日本西化嘅先驅。

唔記得咩刺身，反正特產黎。

一場黎到，食餐牛嘅錢唔慳得掛？不過返到香港先記得自己唁記得食豬…囉。

彩蛋

應該唔少人都知道，香港飛東京途中可以影到富士山，咁其他埠又有冇野影呢？

其實就有嘅，例如我錯失左，飛米子可以見到伯耆大山，又好似今次成功爭取終於捕到嘅櫻島，係咪嘔緊煙…

空港對面就係霧島連山，可以見到韓國岳同高千穗峰。

櫻島，起飛緊影到。

如果冇睇錯應該係「薩摩富士」開聞岳。

最後

多謝觀看。

#寫出你遊歷

#hutchgo資助旅費1000蚊