韓國係我既家鄉
咁澳門呢 ? 可以叫半個屋企 , 因為有親人係果面 , 我一年又會過去 2 – 3 次左右。
係氹仔既酒店區比較少去 , 澳門果面都差不多行均。
而facebook 同 wow 友們都好似經常去咁 , 有時偷閒下 , 過去一下都係好方便既。
————————————————————————————————
星期日過去 , 其實都唔需要一早船 , 都係買左 10點半船去 , 夜晚 9點船返香港。
大家都估我會唔會係屯門上船 , 試下新野?
對不起 , 要大家失望 , 我仍然係上環上船。
而呢次都係出發前果一晚睇下有咩想食 , 行程都係悠閒到非常。
咁下面就開始下我既行程喇
————————————————————————————————
第一餐 : 牛尾湯通粉 ($23)
呢間位於司打口河邊新街既新金城茶餐廳
另外仲叫左個豬扒湯面 , 面就麻麻 (太腍) , 但個豬扒幾好食
第二餐 : hello kitty 葡撻 ($10/件)
呢度有好多味道 , 我選擇左芝士同原味 , 但芝士味係同原味差不多的。
左面係芝士味 , 右面係原味
位置係大馬路入議事亭前地 , 行到係右手面見到間老麥 , 係佢隔離條巷 (板樟堂巷) 入就見到。
第三餐 : 世記咖啡外賣店 (賣草地街乾草圍長信大廈地下)
瓦煲咖啡一定要再飲 ($20)
呢次唔係食豬排包 , 而係試咖哩厚切魚片多士 ($20) , 感覺係厚多士 , 多過厚魚片 , 不過熱辣辣食真係好味既 , 魚片彈牙 , 咖哩味香濃 , 仲要多洋蔥先攞命。
第四餐 : 李康記豆腐花 ($7/細)
唔知做咩呢日好熱 , 嘆番個凍豆腐花休息下。
第五餐 : 南屏雅敘既叉燒蛋三文治 ($18) (十月初五街 , 皇子巷同永安下巷中間)
係 ig 見到人食又挑起我條癮 
呢度厚蛋係好香 , 有澳門人話佢地係用鴨整 , 所以香 d 喎 。
個叉燒都好味 , 唔會死實同乾。
第六餐 : 寶富咖哩麵食既咖哩牛尾。
呢度果然出名咖哩 , 好香濃 , 初初食唔辣 , 愈食愈辣 , 好過癮。
牛尾夠羶 , 惹味 , 夠腍。
第七餐 : 吳廷記既冷糕 ($8/件)
冷糕 , 係一個幾近失傳既傳統食物 , 印象中細細個亞媽有買比我食 (我其實仲好年輕的)。呢次比我係澳門見到 , 更係要買番件啦。
我去到果陣 , 已經要排隊等出爐 , 出左爐之後就見到師傅加好多野落去 , 花生呀 , 芝麻呀咁 , 熱辣辣 , 皮好脆 , 入面煙韌。
店鋪位置係司打口果面既下環街市後面 (鄰近水手斜巷及馬里奧餅店)
———————————————————————————–
係到呢到 , 我地選擇左休息一陣 , 去左澳門科學館
呢度既既形樹都好出名架 , 情侶必到。
————————————————————————————
睇完樹 , 繼續食第八餐 (都係最後一餐) : 舉杯烤肉專門店
呢間燒肉專門店係用炭火燒烤既 , 但分唔到係日式定韓式燒烤 , 不過唔駛驚 , 因為呢度通風好好 , 完全冇焗既感覺 , 不過座位唔多 , 最好 book 左位先。
而呢度有散叫同放題 , 我地選擇左放題 ($278+10%) , 我地 7 點前入座 , 就可以 free 加一 , 但我地就另加左 $60 無酒精任飲 (酒精任飲 +85)。無酒精野飲都好多選擇 , 柚子蜜呀 , 冬瓜茶 , 紅棗茶 , 汽水 等等 , total 12 款。
野食又係好多 , 有刺身 , 燒肉 , 小食。刺身係新鮮既 , 燒肉醃得好好 , 唔需要沾任何醬都好食 , 但佢本身都有醬提供 , 我個人喜歡佢既蜜糖芥末。
其實我地都唔係食左好多野 , 因為要趕船 
而且埋左單後佢地仲會送左個綿花冰既甜品 , 太趕 , 冇影相 , d 冰就好好食 , 係 d 糖醬比較差 , 唔知可唔可以叫佢走醬呢 ?
店舖位置係皇朝區 , 鄰近宋玉生廣場 , 柏林街同馬濟時總督大馬路 (即觀音像對正果條馬路) 交界
完
—————————————————————————————-
原文轉載自: https://wow.esdlife.com/space.php?uid=20275&do=blog&id=301762
