Day 1 Cusco
飛機都未著陸 就見到四周被山包圍住咁！ 人生有幾多次搭飛機係會見到呢個景呢？ 我就真係得一次
落左機之後都係見到四周都係山 一落機其實個感覺係好奇怪 只係行左幾步路 心諗：點解會喘氣架呢？ 好似都唔係好耐冇做運動姐 體能唔係差左咁多呀？。。。。 諗諗下先記得 呢個市鎮既海拔成3000幾米 空氣中既氧分自然少左啦 身體適應唔到就會好易喘氣。
之後就去左hostel做check in 先啦～聞說呢個可可茶 (Coca tea)可以有助舒緩高山症既症狀，所以飲多少少都唔怕啦！ 因為hostel入面可以免費飲 所以我一日都飲好幾杯XD
係hostel放低野抖左陣就出左去行下啦～ 原本好好天架嘛 點知一出到去就有d烏雲啦 ，呢個就係太陽神殿！ 我太大意唔記得左佢既「開殿時間」（Mon.~ Sat. 8:30~17:30; Sun. 14:00~17:00）所以今日就只好係出面影一影相就算
之後就一直行啦 去到武器廣場 係南美洲國家，幾乎每個城市都會有一個中心廣場，果度聚集左城市入面最重要既教堂同埋一d具有歷史意義既建築，好多人都中意係個廣場度“Pasar”(可以理解為歇着)，餵下雀仔呀、睇下書咁。在庫斯科呢度，武器廣場就係最熱鬧既地方啦，每人都有成千上萬既游客會係度經過呀 食下野咁，當地既人有d都會係度休息下咁，不過會有d着住傳統服飾既婦女和小朋友呢就會抱住隻小羊駝（即草泥緊）坐係附近既小巷度或者教堂門口既樓梯上面，就吸引你去同佢地影相啦 世界上冇免費午餐！當然影完會收你錢啦
庫斯科主教座堂 Catedral del Cuzco
呢座教堂建於1550年 係庫斯科第一個大教堂。據聞佢係殖民統治者向當地既土著民宣揚天主教信仰既最典型例子。西班牙統治者係修建大教堂果陣由薩克塞瓦曼搬左好多大石黎做建築材料。呢座教堂係去既400幾年 都經歷左4次大地震 受到唔同程度的損壞，但都好好彩可以生存得到。大教堂入面有好多既油畫同埋裝飾，但重點係咩？係有安第斯山地區特色既《最後的晚餐》。同原著有咩分別呢？ 就係耶稣面前個盤係裝住一隻烤美洲粟鼠。
行到咁上下都肚餓啦 當然要醫肚仔啦！
上網見到呢間Los Toldos Chicken 好多好評喎！所以就入左去試啦～
食得多雞牛豬羊魚都嫌悶啦 今次要食得特別d啦 哈哈！
食咩？ 就係食草泥馬肉啦 雖然佢好得意 有d人會唔捨得食佢 但一場黎到 真係好想試下！ 所以就去左呢間食啦～ 本身都好好奇咩味 食完就發覺佢個d肉既質感同味道都係有d似羊咁架！但又未至於好似羊咁有陣膻味喎。 又唔係話好特別既 但起碼試過之後知道草泥馬原來係呢個味啦！
拿！用儲開Starbucks 杯既朋友要注意啦～ Cusco都有唯一一間既Starbucks架！ 就係武器廣場果邊既 要買就唔好錯過啦 佢個杯係印左Machu Picchu架 好靚！ 冇儲開杯既我都忍唔住要番隻！
附近又有間朱古力同可可博物館既～ 入面就有好多唔同既朱古力products啦 就好似呢個咁！ 唔同味既朱古力jam！ 貪心既我好似隻隻都試過曬XD
Day 2 Ollantaytambo
由Cusco去Ollantaytambo呢就通常都要book車既 坐d小型巴士上去呢個鎮 果日一大朝早6點幾就去左搭車啦
當日天氣都唔好 周不時都落雨 仲好多雲！ 係張相入面可以見到d雲有幾低 就咁影相出嚟都覺得好近呀 (事實上係好低 :P)
去左hostel check-in之後就去食個lunch先 呢個鎮唔係好多café架咋 所以就求其去左間醫一醫肚先！ 四周環境都幾舒服 又可以望到出面
食完野趁佢冇咩雨就出發啦 去下當地既景點 Pinkuylluna mountain 之前印加民族既人係呢個山起左座塔既 不過都冇點樣做過保養 所以宜家都仲見到算幾完整既已經好好啦
其實d路都係幾爛下既 所以每行一步都要好小心 ！加上又有小小雨 所以都比較滑 本身覺得有排先行到 望到個距離真係想放棄 落雨真係冇咩mood 但不知不覺行行下 見到咁近 就好有動力再行埋上去啦！
不枉我用左咁多時間 落住雨都上去！ 上到去再俯瞰番落去原來有咁既景色架！ 即使天氣唔係太好 但就咁望我都覺得好靚 好有歐洲既感覺 又係紅磚既屋頂咁 :D！ 見佢雨勢好似有增無減咁 所以我都冇逗留好耐lu~
行番落去經過人地屋企 比我見到佢地啦^0^ 佢地個樣懵懵下好得意 好似摸下佢地！XD
之後番左hostel 抖左陣見到時間都差唔多就去左一間餐廳食野 上完山都用左唔少力氣 所以打算食多少少野啦
就叫左d當地有既食材 所以會相對上平少少 就係牛油果沙律啦！ 加埋右圖呢個就特別啦 係天竺鼠加藜麥！本身就咁睇其實都唔覺得係d咩架 但如果望真d 佢有隻手….. 就知佢真係天竺鼠啦！ 又係好可愛既動物 但我又係食左佢。。。 因為佢係烤既 所以食落去其實個味又好似烤乳豬咁 真係冇咩分別 同埋佢d肉既質地都好似乳豬咁 比較係嫩既。
咁早起身真係快攰d 食完個晚餐都番去hostel梳洗完就訓啦 第二朝又要早起 重點終於來臨！ 所以好期待 亦都求神拜佛唔好落雨！
Day 3 Machu picchu
一大朝早食左少少野就要去火車站度等火車啦 非常感恩既係… 好好天！！ 有陽光架囉係！ 想像唔到前一日滂沱大雨 第二日可以有d陽光！ 天公造美 ^^
呢架就係我搭既火車啦 佢有兩間公司既 其中一間就係呢間 Peru rail 多人搭d (好似係)！另一間叫Inca rail
搭火車途中其實已經見到好多靚景！ 所以本身咁早起身想訓既我 見到之後都唔捨得訓啦！
事關搭火車呢其實唔可以直接上Machu Picchu既 佢只係去到一個鎮叫Aguas Calientes 架姐～ 見到落車呢個牌 就知自己到左架啦 😀
係呢個鎮住其實都唔錯 方便上Machu Picchu！ 而且環境又靚喎～ 之後就要去等巴士上去Machu Picchu既入口啦～
一落車就會見到呢個入口 未入去已經覺得興奮啦！ 我以為我已經算早架啦 點知仲有咁多人早過我 都好既 早少少冇咁多人嘛～
一入到去其實都未見到d咩既 因為要上高少少先會開始有d睇頭
上到一半啦！就開始見到佢個景～ 好多位都好似梯田咁 一層層咁樣 好有條理既 見到咁靚 但我忍住先！我知道再上高d會更加好睇 所以影左一兩張相就直接衝上去啦～
就係呢度！ 呢個景應該就係最多人影既地方了～ 千辛萬苦上到嚟呢度 (因為高海拔 所以行每步路上斜 上樓梯都不斷喘氣) 就係為左呢一刻咋！！ 當時見到呢個景 真係唔捨得走 我都不為意地係呢個位附近企左好似都有一個鐘 一直就係望住呢個景有幾咁壯觀 有幾咁宏偉 覺得係時候繼續行啦 之後就走lu ~ 向下行
落到下面少少 我再望下d石 心諗點解以前既人可以咁勁架呢？ 宜家既建築物都要有d磚加混凝土先會咁穩固架姐 以前既人用既石 仲要係唔同大小既 又冇混凝土 點解都可以有同樣既效果架呢？
之後再行落d 望番上去 原來個景係咁既 遠睇就好似一層層樓梯咁 😛
行到去個廣場(左圖)之後可以見到自己其實四面環山咁 行去周邊望望 就會見到自己係一個幾高既山上面 我又係度諗 當時d印加人係點樣係呢度生活架呢？ 要搵食物呀 運輸上都有好大既困難！
沿住條路行既時候你就會見到好多呢d用石砌成既牆～ 好佩服佢地用唔同大小既石都可以砌到高度差唔多！
路途上既小驚喜^0^！ 剃左毛既草泥馬～ 佢係呢度自由奔跑架！ 可能佢已經見慣大場面 好多人都會摸下佢呀 同佢影相咁 佢都唔會有咩反應 所以我都唔執輸同佢影番幾張相！ 我仲要去到咁近影佢大頭相佢都唔驚tim! 呢隻野真係好得意 😛
當你見到呢舊石 意味著去到尾聲啦 睇落去平平無其 但其實個外型已經話左比你知 佢係Machu Picchu座山既外型了！ 初頭都睇唔出 係有個Guide講 我再望多幾眼先發現！
成個行程雖然唔算好長 都係係呢度逗留左2個幾3個鐘左右 但已經留下左深刻既印象 係我畢生難忘既回憶！ 上山已經唔簡單 以前既人仲要係上面起一座咁大既建築物 想像唔到係用左幾多人力物力去做呢件事，不過係值得既 到宜家我地呢d後人仲可以欣賞到呢個景 呢個藝術同心血～ 我為佢地感到驕傲!
#寫出你遊歷 #hutchgo資助旅費1000蚊
