拜訪宮島大鳥居前，一定要去宮島觀光協會官網睇當日潮汐漲退時間，如果撞正潮漲係落唔到去大鳥居影相架！所以一定要預好潮漲前或潮退後時間先好拜訪大鳥居啊～
前往方法：市區喺八丁堀站坐紅色2號電車線到總站(広電宮島口)，全程大約1個鐘。
碼頭就係電車站側邊～一邊係JR宮島渡輪既碼頭，而另一邊係松大汽船既碼頭。因為我手上持有Hiroshima Tourist Pass，所以可以任意轉乘呢兩隻船都得，但因為JR宮島渡輪既航線接近大鳥居多d，所以就揀左搭JR宮島渡輪！
搭船途中已經可以見到大鳥居，離遠已經見到好多人堆晒係大鳥居附近。落船之後，去嚴島神社都仲有段距離，落船之後沿住海邊行十幾分鐘就會到大鳥居架喇。行去大鳥居既途中見到唔少鹿仔，好可愛呢～
潮退之後既大鳥居，近睇果然真係好宏偉！
拜訪完大鳥居，諗住去埋附近既嚴國神社等潮漲返黎再影相，所以去左坐纜車上彌山。去到嚴國神社側邊，有條梯通上去五重塔同千疊閣。
係紅葉谷公園既入口有免費穿梭巴士去紅葉谷既纜車站，但為左欣賞沿途風景，最後都係揀行路。好在沿途都好多樹蔭，加上路上都係得幾段樓梯，所以成段旅程唔算吃力。
行左廿分鐘，終於黎到紅葉谷站噜！第一件事當然就係買車飛搭纜車啦！
呢程䌫車分開兩程，第一程係紅葉谷站搭去榧谷站，每個車廂可以裝8個人，人少果陣都唔洗點同陌生人一齊坐。
去到榧谷站之後，就要轉坐大䌫車。䌫車每十五分鐘有一班次，要同其他乘客一齊坐。
坐左幾分鐘之後終於黎到獅子岩站。行去展望台，可以見到對面岸既能美島同小黑神島。
之後既路程就係行上彌山～初頭路段都唔太吃力，後段既樓梯愈行愈chur，好在途中都有唔少遮蔭！
經過一番掙扎，終於到彌山本堂同靈火堂！
然後再繼續往上爬，終於到彌山山頂嚕～行去展望台，呢度仲高過獅子岩個展望台，可以望得更加遠～
休息一陣之後就落返山嚕～行另一條步道落山可以睇到彌山七不思議之一既「干滿岩」，有好多遊客拋銀許願～
因為沿途搵唔到野食，所以提早去返嚴島神社。果陣大鳥居已經係水中央，但仲未漲晒潮。如果漲潮既話係連神社既地基都浸滿水，可惜今程睇唔到，好遺憾！
#寫出你遊歷 #hutchgo資助旅費1000蚊
