#寫出你遊歷 #hutchgo資助旅費1000蚊
今次去澳洲，我唔係淨係去大洋路嘅，不過呢由於我嘅行程太長啦，所以今次就淨係介紹我係大洋路嘅行程啦。如果大家都想去嘅話，我極度建議大家上網搵一搵唔同嘅網站嘅local tour，因為唔同嘅package除咗價錢上有分別，你哋去嘅地點啊或者行程都會唔同，所以你哋都係要睇清楚先好買啦。如果你哋夏天去嘅話就記住帶防曬乳，同埋帶多啲水，最好就帶埋副黑超同埋把遮啦。
我今次book個個local tour一早七點半就已經喺我酒店門口等緊我啦，所以呢我哋就差唔多六點半起身，急急腳食咗個早餐就開車去大洋路啦。
Torquay & Bells Beach
我哋落車第一站就黎到Torquay & Bells Beach，佢係大洋路嘅起點嚟嘅，最出名呢就係滑浪，每年呢度呢都會舉辦一個號聲全世界距離最長嘅滑浪比賽”Rip Curl Pro”添。不過我哋呢就冇喺度行好耐，因為時間都好緊迫啊。我哋就喺個瞭望台嗰度望到個海灘嗰度，都唔難發現有幾個喺度滑緊浪嘅人。就係咁逗留左大約半個鐘，去埋個廁所，我哋就去下一個目的地啦。
Big Hill
Big hill最出名嘅呢就係睇懸崖啦，老實講啦我之前去過台灣睇嗰個叫做東北角，都冇今次呢個咁壯觀呀。
Great Otway National Park
跟住嚟到Great Otway National Park，就會發現到好可愛嘅無尾熊。唔單止咁呀，仲有好多鸚鵡（澳洲國王鸚鵡）添。我哋就喺嗰度買咗啲飼料啦，啲鸚鵡嗰咀一野叮落嚟真係好鬼死痛㗎。
The Twelve Apostles
嚟到今次旅程嘅重點啦， 12門徒石啊。呢個係大洋路最出名嘅地標同埋景點，嗰度嘅導遊同我哋解釋話呢度嘅形成，係因為南冰洋嘅風暴，同埋大風嘅侵蝕，所以呢係海上面就形成左好多個窿，啲窿不斷變大最後呢就冧咗，則剩返我哋而家見到嘅石灰岩啦。叫就叫左12門徒啦，不過呢其實你淨係見到得七舊石嘅啫，因為其他個5舊都已經被侵蝕左啦。嚟到呢度除咗可以喺觀景台到影相之外，仲可以行落去嘅，不過大家就要小心啦，因為啲石頭真係好陡同埋好濕，一個唔小心跌倒嘅話，就會俾啲石頭界親㗎啦。
Loch Ard Gorge
呢個Loch Ard Gorge最有看頭嘅呢就係嗰個比兩邊懸崖包住嘅海峽啦，因為地形嘅關係呢，呢度嘅海浪都幾大，我哋睇嗰陣時呢嗰啲風係咁吹埋嚟，頭髮都俾佢吹亂晒，同埋都差唔多黃昏時段，都開始有啲凍，所以記住帶返件風褸啦。喺呢度呢你仲可以落去下面嗰個沙灘嗰度影相添。
Day 1嘅行程都差唔多啦，我哋之後返咗去市區食夜晚，就番左酒店準備第日嘅行程啦。
London Bridge
呢個London bridge唔係倫敦嗰個啊，佢都係大洋路嘅其中一舊石頭，不過個外型又真係幾似倫敦個個London bridge，中間仲要有個窿添。以前呢度係可以行上去架，不過後尾就冧咗斷咗一節，最好笑嘅係，佢冧嗰陣有兩個人喺上面被困，要出動到直升機救翻佢哋。
Bay of Islands Coastal Park
我哋已經差唔多黎到大洋路嘅尾聲啦，跟住我哋嚟到Bay of Islands Coastal Park，係一個海岸公園，一個好重要嘅海鳥棲息地，係呢個海岸線到行下真係幾舒服架。我建議大家可以去Warrnambool買嘢食，之後帶去Tower Hill Wildlife Reserve野餐。
Tower Hill Wildlife Reserve
呢度係一個休息站同埋野生動物嘅保護地方，亦都係我今次行程嘅最後一個景點，我哋亦都買咗啲食物係呢度野餐，大家放心，呢度唔會好似香港咁，有啲馬嬲雀仔黎搶你嘢食，所以大家盡情食啦。
嚟到澳洲墨爾本嘅話，我極度建議大家抽返一兩日嚟大洋路玩，如果行程好趕急嘅，都起碼抽返一日啦，我好肯定你嚟咗，一定畢生難忘，唔會後悔，當然，最好就最少兩日啦，因為一日真係行唔晒啲景點㗎。
