去完馬爾代夫返黎啦!! … 結婚週年慶祝~

9月 9, 2016

上星期去完馬爾代夫返黎啦（星期日返到黎投票），去左一星期，老公一直都好想去呢啲陽光與海灘嘅地方，但我呢啲嚴重地容易浪暈人士就不嬲唔係太太太愛好海洋嘅，都係鍾意歷史長、文化水平高嘅地方，所以之前都係去歐洲城市比較多。今次就等我遷就返老公啦，哈哈。時間仲要剛好係結婚兩週年（8月31日），真係好好嘅結婚週年慶祝trip！

不過，戴返頭盔先，今次去馬代，之前又分享過不少歐洲trip，唔知會唔會有人覺得：哇，你地一定係有錢人… 好多假期成日可以去玩…

其實唔係呀！我地都係打工仔咋，普通人一個，但我地會儲錢、儲假期，平日生活好簡樸，加上老公係非常非常非常非常鍾意 & 擅長旅遊優惠同格價（我成日話佢應該做旅遊業），令我地可以用比較平嘅價錢去玩（係平啲，又唔洗窮遊咁辛苦嘅，哈哈）！所以如果你地都有想去嘅地方，去啦！馬爾代夫、挪威、瑞士……都唔係超超超難去嘅地方。當然，有老公plan好晒所有野，我印印腳就最開心啦！多謝老公！>w<

我地住的resort，唔係超豪、有私人管家果種，不過service都唔錯，無招待小朋友，所以都係好清靜、適合honeymoon

water villa 真係超正，even我麻麻地鍾意游水，但住water villa、係sun desk坐下hea下、一行落去就係海、一上水就可以去沖涼、訓覺都聽到海浪聲，本身就係一種享受

我地間water villa仲有露天jacuzzi，開窗望到海景添，我好似之前都未試過”宅”，原來都幾舒服，同埋覺得自己好似sims city入面啲角色，哈哈哈哈

慶祝wedding anniversary，resort佈置同送個果盤有啲求其，算啦都話我地間resort唔係超豪果種 😛

除左係water villa玩，我地當然有準時出黎餐廳食buffet啦當然，kaka，同埋resort個沙灘行下游下浮潛下hea下咁樣，沙灘好靚，啲沙好幼、好白

又一日搵左兩個鐘去做spa，大約HK$700/人，唔平架，當Anniversary禮物，哈哈

呢間Resort係要坐sea plane，來回要310美元/人，相當肉赤，同埋我係唔enjoy架，都話左我好易暈浪，不過老公就好excited，咁其實天氣好時，風景真係好好，見到好多環礁

其實我地係villa住左4日3晚，另外3晚我地係去左另一個居民島，簡直係頹… 好多地方仲有啲基建未起好。不過！啲人(satffs或local) 都係好nice嘅。同埋！！我地參加嘅活動大多數係居民島join，平過resort好多架，而且唔洗住resort但出左海玩，浪費留係resort享受嘅時間呀嘛。活動包括浮潛boat trip 啦，第一次深潛啦（揹氧氣樽，一對一coaching，好professional架！不過冇乜影相，video比較多）、beach candle light dinner… 其中有兩程船都遇到好多海豚，船長特登開慢啲，其中有一程，啲海豚仲游到我地架船旁邊游來游去、又跳起轉圈，成個過程十幾至二十分鐘，真係近到不得了嘅近距離接觸！！！船員話，dolphin好喜歡同人親近架（前提當然係要愛錫dolphin啦），無端端變左dolphin cruise咁，正！