京都，令人即時聯想到寺廟、藝伎、櫻花、抹茶、和服的千年古都。
十幾年前第一次遊日本，就係去京阪神。之後再去過京都幾次，祇園、清水寺、金閣寺、八坂神社、嵐山渡月橋、嵯峨野小火車等例牌景點，都去過了。上年再去，適逢明治維新150周年，決定走條偽文青懷古路線！
小弟對日本幕末歷史特別有興趣，今趟旅程有兩個重點：1) 東映太秦映画村，2) 二条城，兩處都有濃濃江戶時代色彩。
飛関西機場，落機即刻坐JR Haruka列車去京都。既然係歷史之旅，決定住古色古香的「藏屋」(日文係蔵屋)，即係翻新過的傳統「京町家」，既保留傳統和風，亦相當新淨。
太秦映画村
去太秦映画村，可以坐JR嵯峨野線去太秦站，如果時間緊迫，同一日順道去嵐山、嵯峨野都好方便。
向來唔鍾意堆砌出來的主題公園，迪士尼呀、環球影城呀，都無興趣，但太秦映画村係例外，因為彷彿走進時光隧道，回到江戶時代，遇上赫赫有名的歷史人物。
江戶風情城下町
吉原花街，古時尋花問柳之地
定時的表演，呢場係新選組劍客激戰某某
遊客大把影相打卡機會
所謂「映画村」，即係電影片場，當然要參觀吓電影製作。呢場拍刺客與護衛激戰，十分詼諧有趣。
幪面超人出沒注意！有個展館有歷代幪面超人。唔肯定是否期間限定，去之前最好上網查一查。
村內餐廳，當然都以東映製作的歷史劇為主題
二条城
世界遺產二条城，係由開創江戶時代的德川家康興建。德川幕府在江戶(即係東京)，偏偏於天皇所在的京都建城，每年只有去京都見天皇時才住幾日，但就此為世界留下文化遺產。
日本的古城，例如大阪城、熊本城、通常有天守閣，咁二条城的天守閣呢？原來於1750年被雷劈中後焚毁，自此沒重建。所以新舊首都東京同京都一樣，都無天守閣。上圖就係二条城天守閣遺跡。
二条城最有名的事件，發生於1867年，江戶幕府第十五代將軍德川慶喜在此舉行「大政奉還」儀式，將政權歸還給了明治天皇。日本經過鎌倉幕府、室町幕府、江戶幕府，連續682年的幕府時代到此為止。翌年1868年開始明治維新，日本走向現代化。
河原町附近歷史遺跡
祇園及河原町一帶遊客區，都有唔少幕末歷史寶藏，例如坂本龍馬遇害地……
「池田屋騷動」遺址。新選組半夜突擊池田屋，捕殺尊王攘夷派。
明智光秀
途經亀岡站，見到明智光秀的絕命詩： 「順逆無二門，大道徹心源。五十五年夢，覺來歸一元。」
係，就係於「本能寺之變」造反害死織田信長那位明智光秀，就算唔係戰國迷都可能聽過。話說明智光秀奉織田信長之命統治丹波時，在亀岡築了亀山城。於是亀岡市每年5月3日舉辦光秀祭，戰國迷不容錯過。
#寫出你遊歷 #hutchgo資助旅費1000蚊
