九州福岡6日5夜 美食靚景盡在九州
大家好又係我啦，上次同大家分享左我係大阪嘅經歷啦，今次我就帶你地去到日本嘅另一邊——九州福岡啦。今次成個trip用嘅錢仲平過上次去大阪，連埋機票住宿都只係5000到，無計啦，日本交通真係好鬼貴，淨係transit都超過10000yen 啦！
Day 1 香港 à福岡
HKG àFUK ~$1260
今次我坐早機去嘅，大約十點到就起飛，不過今次架飛機降落個陣就無咁順利luuuu，因為我遇到側風，所以我一程機體驗左兩次起飛同降落，亦都因為咁，我又遲左一個中先到福岡機場。
到左福岡機場之後，我地就去左買Fukuoka Tourist City Pass，買左呢個transit個陣真係慳番唔少架，記住買個陣要比passport佢。
最後我就買左：
福岡市內（除西鐵電車）：成人820yen x2
福岡市內＋太宰府：成人1340 yen x1
張卡就係咁嘅樣啦。
搞掂哂尐野之後，我地就番左民宿放低尐野同埋休息左一陣，夜晚就去左博多呢個大站周圍行同埋食野，最後仲去左機鋪玩左一陣添。
Day 2 豪斯登堡
琴日好早就訓左，因為今日我地一早就要起身坐兩個鐘頭車入去豪斯登堡啦，朝早去左民宿附近嘅family mart買左個飯團同枝果汁之後，我就去左天神站坐巴士去豪斯登堡。
0900：高速巴士︰西鉄天神高速バスターミナルà豪斯登堡
1100：到達豪斯登堡
唔講我仲以為自己去左歐洲呀大佬，呢度嘅環境真係好靚，又有靚景，花海呀，風車呀，又有得玩唔同嘅機動遊戲，呢度仲有zipline玩，不過我去個陣就close左，唔係我都想去玩呀唉，但講真個句，呢度嘅機動遊戲同鬼屋個尐就真係咪抱咁大嘅期望啦，因為真係唔好玩，如果你同海洋公園個尐比嘅話。
呢度仲有船坐添，係船上chill住，影下靚景，置身係歐陸風情呢環境下，你都咪話唔正呀，搞到我真係唔想番香港呀。
值得留意嘅係係呢到食lunch好鬼貴，食左一碗我覺得麻麻地好食嘅拉麵都差唔多1200yen。我大約2000就係呢到走左番番去天神啦。
Day 3 海中道海濱公園 （沿海邊踩單車）
今日將會用第一張Fukuoka Tourist City Pass，朝早就食左個蕎麥麵，都唔錯，食落好飽肚，但後尾去踩單車先知自己伏左自己，因為呢種飽肚只係持續左兩個鐘。
交通：JR香椎線「海之中道站」落車
去到呢個站就租左架單車周圍踩下熱下身先啦，順便影下尐靚景，上到山仲可以望到個海，個尐海風吹過黎嘅感覺真係好舒服呀！
踩踩下先知原來呢度仲有個好似動物園嘅地方，咁我地就泊低左架車，就入左去啦。
入面都有唔少嘅動物，馬騮呀，袋鼠呀，孔雀呀都有，見佢地仲chill過我，就幫佢地影左幾張大頭照。
係呢度玩到大約6 ，7點，我地就搭番車去博多行下街同埋食晚飯啦。
Day 4 「海洋世界海之中道」水族館 ＋福岡塔
講真，我黎個陣真係唔知原來這個水族館的建築面積是全日本第5 位，不過如果要我比較呢個同埋係大阪個個海游館，我應該會揀呢個啦，點解？因為呢度有好多表現睇囉，每日好似有三個唔同嘅時段有海豚嘅表現睇，佢哋真係好鬼聽話，跳得又高。
仲有呀，呢度係有坐鵝睇架，我地黎到佢地就係咁叫，真係好過癮呀。
一個晏就睇完左呢個水族館之後，我地就番番去福岡市，為我地要趕得切係日落之前要去到福岡塔呀，上去福岡塔又係要比錢嘅，所以真係要預多尐時間呀，唔係miss左個日落嘅景就真係喊都無用啦。
交通：博多站 à博多巴士總站 à西鐵巴士306號線 à福岡塔站
Day 5 太宰府巿+ 天神地下街
今日一早起身，去左family mart買左個靚早餐，就出發去太宰府啦，交通方面我地就用左個張(福岡市內＋太宰府)嘅fukuoka Tourist Pass。一出個車站就係表參道商店街啦，一路直行就會到達太宰府啦，入到去影下相，deng下50yen落去祈福呀，仲有旁邊有幾個箱，你可以係隔離放低100yen，就可以係隔離攞個符啦。
出到係表參道商店街就一定要試個梅枝餅，一個熱辣辣嘅梅枝餅，食落其實無咩特別，係一個入面有紅豆蓉嘅餅，呢到仲有一間Starbucks，入面嘅嘢好食過香港多多聲！
仲有呀仲有呀，係太宰府隔離仲有個菖蒲花園，個到嘅花都開得好靚好大，仲有一個好靚嘅湖，絕對係打卡必備呀。
臨走嘅時候我地仲去左食udon，不過如果你係好中意食一蘭嘅話，你可以係太宰府站隔離嘅一蘭排隊去食，不過你就預左有排排啦，因為真係好鬼死多人呀大佬。
離開左太宰府之後，我地就番番天神個邊啦，點解？你覺得黎到日本有咩野係一定要做但係我地仲未做呀？無錯啦，就係shopping啦！我地周圍行下outlet，藥妝呀，仲有就得行daiso，咩都100yen抵到呢，我個銀包都係因為咁無左好多個100yen呀，下次再買真係要斬手指啦。最後我地係地下街食左魚生飯，個尐魚生好新鮮，香港個尐真係無得比呀！
Day 6 福岡 à香港
我地早機番香港呀，所以今日就無行程啦。大家估下我地番到香港即刻食咩，係譚仔呀哈哈！
#寫出你遊歷#hutchgo資助旅費1000蚊
