炎炎夏日，仲要去泰國呢啲30幾40度既地方，簡直好似去左桑拿咁。呢個chur 玩水上活動既遊記應該就最適合時下既年輕人！
首先，係布吉，我會建議住近巴東海灘，近個度會比較方便。另外，交通方面，建議安裝一個apps 叫 Grab，好似 Uber 咁，可以叫車，同埋都比較安全。但係如果你住近巴東海灘，其實好多景點都係步行距離。
Day 1：
第一站，到訪猴子洞穴寺。裡面有好多馬嬲，好多商店都賣香蕉，生果比你餵馬嬲。再坐車過多一段路就會到 Sa Nang Manora 瀑布，可以去個度影下一D 文青相。坐左兩個幾鐘頭車到左攀牙，係個度騎大笨象，玩激流同埋ATV 四驅車。成個package 每人大概 HKD340，都算幾抵。
晚餐食左一間比較出名既西餐廳，環境幾好，清涼同埋好鍾意個度既文化，好Open，係個度食飯價錢相對上亦都平過香港。
夜晚去左睇泰國好出名既人妖表演，因為好早訂飛既緣故，另外亦都買左VIP ticket，所以編既位係中間第二行。呢世人都未試過咁近睇表演，同埋每人都係 HKD150 左右，所以我覺得係值得既。Show 完左之後會有表演個D人 叫你同佢影相，但係記住佢地每一個影相都要比 tips！每人大概 HKD50，所以小心D！
Day 2：
晨咁早起身就去玩叢林飛索，都玩左大概3個鐘。我之前去過清邁玩過，其實都差唔多，但係我join 個公司就有D 山要行，所以對於我呢D 平時唔行山既人相對上可能吃力小小，但係都係接受到既範圍。另外，記得記得去玩既時候要搽蚊怕水！！我就係唔記得搽，搞到周身都係蚊爛！玩完就返市區繼續覓食。去左間印度/土耳其既餐廳，野食唔錯，但係相對上比較熱氣。
係巴東，點會唔少得去巴東海灘啊！講真，平心而論，其實都只不過係一個海灘 haha，咁對比起香港個水質係好好多，但係同其他泰國地方比，其實都無乜大既差別，所以可以去到訪，玩下水咁。沿住海灘行落去就係一個大型購物中心，附近都有當地既商舖。我就比較 prefer 係當地商舖買野，因為同大型商店比，其實賣既野都差唔多，當地商舖會地道D，但係價錢就差好遠。但係如果你想涼下冷氣，可以去個D 大型購物中心既，但係手信個D 我就建議係其他地方買啦！
當晚我地去左布吉幻多奇樂園，因為上網睇佢好似係布吉好出名咁。其實成個表演都幾特別，幾好睇既，但係我覺得個價錢偏貴咯。佢個樂園大部分都係舖頭比你買野，個設計都幾特別，但係入場費真係好貴。我記得每個人大概都要 HKD500 。如果有興趣可以睇下，難得去到布吉。
Day 3：
第三日就係我地期待已久既潛水日！我地坐左3個鐘船先到披披島（Phi Phi Island），而我地係個度潛左兩次水，一次係佢隔離一個細島仔度，另一次係一個叫 Turtle rock既地方。顧名思義，第二次潛既時候係真係有好多海龜！！
過左大半日，我地再坐多一個鐘既船到 Shark point。本身期待會見到鯊魚，但係可能我地運氣唔好，睇唔到。但係聽個度D 當地人講話平時都會有機會見到，所以如果你想睇鯊魚同埋海龜，不防去呢兩個潛水熱點碰碰運氣！個一晚都去左一個夜市，叫做 Banzaan Fresh Market，入面有好多街邊野食，可以不防去掃下街！
Day 4：
最後一日，其實真係好唔捨得布吉（因為本身我係一個好鍾意陽光與海灘既人）。第一站去左水晶島（Panak Island）既蝙蝠洞穴，接住就去左割喉島（Hong Island）坐獨木舟。
接住就係007島（James Bond Island），班兒島（Panyee Island），同埋納卡島（Naka Island）。
我係納卡島仲玩埋水上滑翔傘，但係都幾貴，都200幾300蚊但係玩得個幾分鐘。
夜晚去左食正宗既泰國野，泰國食真係好平。我地叫左7碟送，但係最終成餐都係 HKD240，真係好抵，同埋好飽。
#寫出你遊歷 #hutchgo資助旅費1000蚊
