#寫出你遊歷 #hutchgo資助旅費1000蚊
講起越南旅行，多數人都會諗起峴港，貪峴港多野玩，既有Bana Hill，又有resort可以嘆住咁同陽光玩遊戲。其實越南首都河內都係一個好值得一去嘅地方。位於北越嘅河內係越南嘅工業、文化中心，除了人煙稠密，市內的交通更是車水馬龍。成千上萬的機車到處穿插，加上道路狹窄，稍不留神，險象環生！然而，與其話呢個係河內危險嘅地方，倒不如當佢係河內嘅特色，地道文化的一種。
介紹我嘅行程之前，先要同大家簡單講下河內旅遊嘅慣常行程。相信大家都聽過下龍灣同沙壩，多數河內嘅旅程都會去埋呢兩個地方。因為呢兩個地方由河內出發係最近，而且河內市入面實在唔需要花太多日子就可以玩個夠。
到埗河內內排國際機場後，就可以喺機場換越南盾同埋買電話卡，但係建議大家唔好換咁多錢住﹝始終機場匯率冇咁抵﹞，市內嘅老街上面不同嘅找換店會比較抵。離開機場去酒店建議選搭的士！因為等巴士將會係一個漫長嘅等待，而且最重要係越南的士非常便宜，跳錶由9千至一萬二千越南盾不等，但要問清楚司機係跳錶計錢定係佢定價，否則落車先嘈就無謂了！
好！即刻睇第一個景點 — 還劍湖
還劍湖位於河內市嘅中心地帶，相傳1418年黎朝太祖意外獲得一把順天劍，成功起義擊退當時佔據越南嘅明朝軍隊，並且創立左黎朝。之後佢喺遊湖嘅時候，把劍突然震動，然後跌左把劍落湖，之後世人就稱之為「還劍湖」。湖邊好多當地人喺到歇息，亦都有好多cafe可以落下休息下，欣賞下湖景，係一個親身感受越南生活嘅地方！湖邊亦都有一個玉山祠，但入面主要係睇風景，冇乜特別吸引之處
聖若瑟主教座堂
又叫做河內大教堂，由1884年開始興建，1888年完工。每天都會有幾場彌撒，但係我去嘅時候就撞唔正，所以影左幾多張相就走左。簡單嚟講，呢個教堂當然冇西方國家嘅雄偉，但都係河內市入面值得一去嘅地方！
沙壩
本身我對沙壩其實冇乜特別憧憬，因為一知道係要搭幾個鐘火車離開河內市去偏遠嘅地方就覺得好廢時。但係去到之後真係令我改觀，眼前一亮！遊沙壩主要就係由一個村莊行去另一個村莊，欣賞沿途嘅景色，非常適合鍾意遠足或者行山嘅朋友。沿途你都會見到一啲當地嘅村民，賣補給物資例如係小食或者水，亦都會賣啲手作，製作精美之餘，價錢亦相宜。如果你想同當地村民有更多囓文化交流，又或者唔想冒住蕩失路嘅風險自己搵路行，你可以選擇聘請當地村民做導遊﹝當然價錢另議﹞，佢地除左會帶你四圍遊歷之外，亦會同你介紹唔同景點同埋佢地村民嘅生活，絕對係文化交流嘅大好機會！
而沙壩最出名同埋最值得睇嘅就係梯田，河內嘅梯田曾經被評為世界七大梯田之一，而且尚未被污染同埋充滿文化色彩，除左欣賞景色，亦可以睇下當地苗族村民嘅生活！
番西邦峰
呢個亦都係去到沙壩一定要去嘅地方，海拔3143米嘅番西邦峰最出名嘅係雲海，你可以選擇搭纜車上山，然後再好似我咁行上去登頂，當然要注意自己應唔應付到，因為越行得高，空氣就越稀疏！但係一路行除左可以欣賞美景同雲海之外，亦可以感受高海拔嘅涼爽天氣，行到上頂峰亦會好有成功感架！
下龍灣
位於越南下龍市，佢嘅特色就係有好多小島矗立喺海面上，有「世界奇觀」之稱。聯合國教科文組織於1994年將下龍灣列入世界遺產。去下龍灣首先就要上網搵啱你心水嘅郵輪tour，其實唔同嘅tour嘅內容都大同小異，都會有獨木舟玩，整越南地道食物，參觀鐘乳石洞等，但你可以按自己行程揀參加幾多日嘅tour。
河內絕對係一個值得一去嘅城市，希望大家鍾意我嘅分享！
